Llibertá titiriteros.

Un actu festivu d’antroxu, entamáu pola Casa’l Conceyu de Madrid, terminó con dos titiriteros deteníos acusaos d’enaltecimientu del terrorismu. Los artistes representaben mesmamente aquello que-yos asocedió. Na so obra un personaxe (una bruxa) ye víctima mientres ta inconsciente del montaxe qu’entama otru personaxe (un policía), qu’asitia una pancarta col testu “GORA ALKA-ETA” por que paeza que la bruxa defende’l terrorismu. Un tercer personaxe (un xuez) decide entós condergala a morrer aforcada. Ye por esa pancarta de “GORA ALKA-ETA” pola qu’un xuez decidió acusar a los titiriteros d’enaltecimientu del terrorismu.

La diferencia ente’l xuez del cuentu que conderga a la bruxa y el xuez real que conderga a los titiriteros ye’l material del que tán fechos: el primeru ye de trapu, el segundu ye un ex policía franquista qu’agora ye xuez de l’Audiencia Nacional.

A naide-y sospriende qu’un xuez asina ataque la llibertá d’espresión y la criación popular ya inclusive decrete prisión ensin fianza pa los dos titiriteros. Pero nun ye cosa solo d’esi xuez. Llevamos tiempu enforma sofriendo esta mesma represión de munches maneres: llei mordaza, detenciones nes sos cases de compañeros y compañeres activistes, reformes del códigu penal, multes, asaltos inxustificaos a llocales de partíos políticos y centros sociales, xente encarcelao por dir a una manifestación…

Entá queden dos personaxes más nesta hestoria: los medios de comunicación y l’Ayuntamientu de Madrid. Los medios polo xeneral sumáronse a construyir la versión del xuez a sabiendes de que ye un bilordiu, un llevantu pa emporcar al Ayuntamientu de Madrid. Y l’Ayuntamientu de Madrid decidió, en cuenta de sofitar a dos trabayadores que contrató y la so llibertá d’espresión, denuncialos por incumplimientu de contratu.

Demasiaos polichinelas nuna hestoria que sería risible si nun tuvieren dos compañeros na cárcele.

Vistos los fechos, l’Asamblea Llibertá Titiriteros esixe:

1.Puesta en llibertá ensin cargos de los dos compañeros de Títeres desde Abajo.

2. Retirada de la denuncia apareyada pol Conceyu de Madrid.

3. Estongar responsabilidaes na cadena del órganu xudicial que mandó prisión ensin fianza pa un delitu inesistente.

Vamos siguir movilizándonos mientres nun se cuíde la llibertá d’espresión y de criación, mientres s’escuerra l’arte del pueblu y mientres los nuesos compañeros tean na cárcele. Quiérennos soles, van tenenos solidaries.

L’ARTE DEL PUEBLU NUN YE ILLEGAL.

LLIBERTÁ TITIRITEROS.

STOP REPRESIÓN.

Manda la to robla a: titiriteroslibertad@riseup.net

Anuncios